Cuculi e Cuzzupe

Si tu vu' sapiri Cuculi e Cuzzupe cchi ssu'
Abbentati na pocu e asuliami

A Pasqua, quannu Cristu è muartu e pu' s'è abbivisciutu
Ha scamacciatu a Morte e n'ha datu libertà
Cumu nu pulicinu i n'uavu friscu sinn'è isciutu
Ogn'ànnu stu miraculu nill'am'arricurdà
D'i tiampi i San Franciscu nonne mamme zie e niputi
'Mpastavanu farina e ova ppi stu juarnu cca
Pregavano a Madonna ca facissa chista pasta santa

Ppi tɾuvari cincu ova tɾasa dintɾ'u gaddrinaru
Ara jocca chieda: "Ppi piaciri, l'ova m'had'i da'!"
Sup'u tavulu paratu cumu si fossi n'ataru
Nu bbuccacciu i sugna tuttu quantu c'had'i divacà
È ɾu grassu di lu puarcu c'ha crisciutu cumu figliu
E glianne e ciciari e castagne c'ha datu a mangià
Benedicellu e divràzzati a' cammisa e 'mpasta

Ohi, San Franciscu, piansaci tu
Parracci direttamenti tu ccu Jesù
Ca Brutta Bestia sinn'hadd'i sta'
Luntanu d'a stianata adduvi staju a 'mpastà
E diciamillu tu quannu d'ammassare basta

Minta i zuccaru tɾiciantu gramm'e liavitu a bustina
Ca dintɾ'u latte chianu chianu s'hadd'i dillattà
E ppu mìschaci nu chilu sanu sanu di farina
Tu dùnaccenne tutta quanta sinni vo' piglià
Di na corchia di limuni grattanì cchiù di na menza
Gira, vota e ɾiminia tosta e moddra s'hadd'i fa'
Tu jettala cussì e supa nu timpagnu stenna

Ohi, San Franciscu, piansaci tu
Parracci direttamenti tu ccu Jesù
Ca Brutta Bestia sinn'hadd'i sta'
Luntanu d'u timpagnu adduj fatica si fa
E diciamillu tu quannu di stennare basta

Conza a pasta cumu forra nu bumminu accuacculatu
E n'uavu c'ha vuddrutu prima tu c'had'i 'nzaccà
Cussì è nàtu nu Cuculu, fanni n'atɾu 'ntɾurciniatu
Di Cuzzùpe fanni dua e mo ti dicu ch'had'i fa'
Cumu pàlummeddre janche e cu n'uavu mmianzu u piattu
I Cuzzupe e ɾi Cuculi 'nta a'tieddra s'hann'i sta'
E ppu dici: Avi Maria, fatt'ù Signu d'a Cruci e 'nfurna

Ohi, San Franciscu, piansaci tu
Parracci direttamenti tu ccu Jesù
Ca Brutta Bestia sinn'hadd'i sta'
Luntanu di stu furnu e luntanu di cca
E diciamillu tu quannu di 'nfurnare basta

Chissa è ɾa storia vera di cumu si 'mpasta l'amuri
A storia d'a Risurrezioni ca ogni annu si fa