موال عجبى
ياليلى 00 ياليلى 00 ياليل 00 وعجبى
عجبى على اللى اشترى قلب الصبايا بمال
ولا يعرف الحب ولا يعرف سملره وجماله
شاف الصبيه حوريه راح وراها وقال
انا طالب القرب ومعايا الثمن جاهز
ابوها شاف الفلوس للقرش حن وقال 00 عجبى
البنت شافت صاحبنا وارث القرشين
وابوها وافق وقال الشبكه بعد يومين
والفاتحه تمت ساعتها وعد بين الاتنين
راحت لابوها تبكى لاجل تترجاه
ودوعها نزلت على الخدود سطرين 00 وعجبى
قالت له يابا عمر المال ما يفدينى
ولا اى راجل باى فلوس يهنينى
وبكره يمكن يشوف غيرى ويرمينى
انا عايزه راجل بقرش حلال يسعدنى
راجل بيعرف يصون ودى ويحمينى 00 وعجبى
ابوها راجل يحب المال ولا يهمه
وفى عينه تلاقى الطمع والقرش فى دمه
وقال موافق وهات الاهل يتلموا
البنت هربت ساعه الشبكه من بيتها
والدمع على الخدود مين اللى حايلمه 00 وعجبى
ياعابد القرش عمر القرش ما يفيدك
وليه فى لحظه طمع بتقول عليه سيدك
وتجرى دايما وراه00 وتفوت مواعيدك
اطلب من الله تلاقى الستر قدامك
ولما تطلب رضاه بالصحه حيزيدك 00 وعجبى
